INSTALACIÓN DAS HERBAS DE SAN XOAN NA BATEA DO PATIO EN COLABORACIÓN COAS FAMILIAS.

 

  Vinte unha crara noite,

noitiña de San Xoán,

poñendo as frescas herbas

na fonte a serenar.

E tan bonita estabas

cal rosa no rosal

que de orballiño fresco

toda cuberta está.

(Rosalía de Castro) 

ECOGRAFÍAS DE GARATUXAS, PESPUNTO E PALABRAS HABITADAS.

 Onte o mes de Abril voltou a entrar pola porta da nosa escola. Retomamos o punto e seguido que bordamos daquela cando o ollo de cámara fotográfica da nosa querida artista habitante Sabela Eiriz se despediu cun sorriso dos que non fan falta nada máis.

    É un privilexio que Sabela nos faga partícipes dos procesos de creación das súas obras e nos invite a coñecer as súas entrañas. Son labirintos misteriosos que descoñecemos e que poñen en valor todo o traballo que hai detrás de cada peza artística. Son manillas de reloxio calcetando bufandas infinitas de horas interminables.

 Son procesos con luces e sombras, son bosquexos con fatigas e enerxía, son xogos con materiais, son visitas a talleres de edición buscando mans que mimen as súas "criaturas", son ilusións e tomas de decisións. Son sons.

Sabela trouxonos "ecografías" dos seus fotolibros. Estamos desexando telos nas  mans e darlle os colos cos que agarimamos as nosas lecturas. Ademais das tintas que se utilicen para editalos, sabemos que nas súas follas a intersección de impresións sensoriais será unha constante. 

Emocionounos evocar ecos de PESPUNTO e GARATUXAS. Emocionounos sentir as pisadas convertidas en pegadas da cámara de Sabela por toda a escola filmando e recollendo intres cotiás e convertindóos en extraordinarios. Emocionounos que unha artista compartira con nós un proceso creativo e creador.

Onte o mes de Abril voltou a entrar pola porta da nosa escola. Nas nosas caras sentimos novamente a maquillaxe azul da intervención  PALABRAS HABITADAS 

Moitas grazas SABELA EIRIZ por compartir o teu sentir,  grazas por habitar no mes da Revolución dos Caraveis o Ceip Heroínas de Sálvora!.

 

 

ESCOLA ABERTA: FAMILIA EXPERTAS CONVERSAN CON NÓS SOBRE TEMAS DO MÁIS VARIADO.

 No marco do proxecto de Escola Aberta as familias expertas seguen achegándonos temas de gran interese para todos e todas nós. Loli,nai de Roi, falounos de distintas cuestións relacionadas cos embarazos, amosóunos unha ecografía, o libro de Baby Pop de Meritxell Martí e Xavier Salomó...David, pai de Irina, compartiu a súa experiencia como mariñeiro de altura, explicándonos a ubicación xeográfica dos mares polos que navega, aparellos de pesca, como é o peteiro do peixe espada,... Pablo, pai de Icia e o seu compañeiro Manolo, mostráronos diversos aspectos relacionados coa súa profesión de doutor no hospital do Barbanza e técnico sanitario de ambulancia. Puidemos observar: equipamento médico da ambulancia, escoitar distintos sons do corpo co fonendoscopio...

Moitas grazas Loli, David, Pablo e Manolo pola vosa visita e conversas!

" A QUE SABE A LÚA?" REPRESENTACIÓN TEATRAL DE MONICREQUES PARA AS AVOAS DE AGADEA.

 Hoxe o Café-Teatro vestiuse de gala para recibir  ás avoas e traballadores/as de AGADEA. A Comunidade de Medianos/as representou o conto "A que sabe a lúa?" con monicreques elaborados por eles/as. A obra foi preparada co profe Gonza nos seus obradoiros de teatro.

Foi un día moi especial cheo de emocións interxeracionais, onde a sabiduría da experiencia da vida do noso público de luxo, misturóuse coa literatura convertida nun guión teatral . Moitas grazas por vir á nosa escola! Grazas ao persoal profesional de AGADEA por facilitarnos estas experiencias tan enriquecedoras para educar na sensibilidade  conxuntamente!

 

 

 

 

 

Este poema queremos adicarllo a todos os avós e avoas que cortaron as silverias dos camiños para que nos poidamos aprender a andar sen mancarnos:

Mira os avós.

Antes eran máis grandes,

máis altos,

máis anchos...

pero devecen coma as follas sen zume.

Aseguran que o tempo é o único culpable,

un furtivo que chega cos dentes afiados

a cravárselles no rostro

mentres dormen

mentres botan farangullas ás pombas dos xardíns

ou xogan coma nenos.

A miúdo falan de vidas que pasaron

e argallan historias,

ao quentaren as mans

sobre a seda dos lumes.

Os avós envellecen devagar,

pero ninguén pode arrincarlles o sorriso,

porque gardan

o segredo do futuro,

máis alá dos seus ollos pequenos.

 

(Ana MªFernández)

ESCOLA ABERTA: FAMILIAS EXPERTAS.

 Os nosos coñecementos seguen ampliándose  grazas ás visitas das familias expertas que preparan charlas,obradoiros... sobre distintos temas. 

 José Antonio, pai de Martín, contóunos distintas cuestións sobre a arquitectura achegándonos planos, maquetas...Juan, o pai de Hugo, mostróunos o seu uniforme de traballo e explicounos como velan pola seguridade da cidadanía como garda civil. Fernando e Nieves , pai e nai de Fernando e Dani agasalláronnos coa música dos seus instrumentos e Puri, nai de Diego, ensinounos a facer unhas deliciosas receitas no ambiente de cociña.

Moitas grazas a todos e todas por adicarnos o voso tempo, saberes que nutren todos os nosos sentidos!

ESCOLA ABERTA: INTRES LECTORES EN FAMILIA.

 Cando nos visitan as familias colaboradoras, danse intres  espontáneos máxicos de lectura entre nenos/as e adultos/as. Son instantes de vinculacións moi umbilicais.