" A QUE SABE A LÚA?" REPRESENTACIÓN TEATRAL DE MONICREQUES PARA AS AVOAS DE AGADEA.

 Hoxe o Café-Teatro vestiuse de gala para recibir  ás avoas e traballadores/as de AGADEA. A Comunidade de Medianos/as representou o conto "A que sabe a lúa?" con monicreques elaborados por eles/as. A obra foi preparada co profe Gonza nos seus obradoiros de teatro.

Foi un día moi especial cheo de emocións interxeracionais, onde a sabiduría da experiencia da vida do noso público de luxo, misturóuse coa literatura convertida nun guión teatral . Moitas grazas por vir á nosa escola! Grazas ao persoal profesional de AGADEA por facilitarnos estas experiencias tan enriquecedoras para educar na sensibilidade  conxuntamente!

 

 

 

 

 

Este poema queremos adicarllo a todos os avós e avoas que cortaron as silverias dos camiños para que nos poidamos aprender a andar sen mancarnos:

Mira os avós.

Antes eran máis grandes,

máis altos,

máis anchos...

pero devecen coma as follas sen zume.

Aseguran que o tempo é o único culpable,

un furtivo que chega cos dentes afiados

a cravárselles no rostro

mentres dormen

mentres botan farangullas ás pombas dos xardíns

ou xogan coma nenos.

A miúdo falan de vidas que pasaron

e argallan historias,

ao quentaren as mans

sobre a seda dos lumes.

Os avós envellecen devagar,

pero ninguén pode arrincarlles o sorriso,

porque gardan

o segredo do futuro,

máis alá dos seus ollos pequenos.

 

(Ana MªFernández)

PUNTO HEROÍNAS DO CAFÉ-TEATRO.

 

 

Seguimos presentando os Puntos Heroínas dos distintos ambientes da escola. Hoxe estamos no Punto Heroínas do Café Teatro ( Identidade de Artes escénicas). Nel podemos atopar a actrices galegas coma: Susana Sampedro, Cristina Collazo, María Castro,...Estrelas da pantalla, estrelas dos escenarios, ...as nosas estrelas galegas, tendo o orgullo que nesta alfombra vermella Susana Sampedro é de Ribeira.

OBRADOIRO DE TEATRO: MONICREQUES "A QUE SABE A LÚA?"

 Esta semana continuamos cos obradoiros de teatro co mestre Gonzalo. O Café-Teatro (Identidade de Artes escénicas) encheuse de  monicreques de pau do conto "A que sabe a lúa?" . Seguimos desfrutando dos saberes e coñeceres de Gonza.

27 DE MARZO. DÍA DO TEATRO. OBRADOIRO CO MESTRE GONZALO.

  Que mellor xeito para celebrar o Día do Teatro que co noso querido mestre Gonzalo De Lucas! Esta semana fixemos distintos obradoiros de teatro con el. Seleccionamos varios contos para dramatizar a través da elaboración de diversos monicreques de pau. Traballamos no Café-Teatro, nos ambientes de identidade artística e na Biblioteca. Despois das vacacións de Semana Santa seguiremos con máis obradoiros interpretando as obras que estamos preparando. Algún dos títulos escollidos foron: "A mellor sopa do mundo"."Onde viven os monstros". "A que sabe a lúa?"

Moitas grazas por todo Gonza! Por facernos desfrutar no escenario compartindo recursos para  expresarnos  a través de distintas linguaxes. Por transmitirnos o entusiasmo a través de personaxes  e inventando novos universos cheos de enerxía positiva entre os telóns!