REMATAMOS O LIBRO " A FOLLA AZUL" DE ANDREA MACEIRAS NO CLUB DE LECTURA "MEDIO PAN"

Esta semana rematamos o libro "A folla azul" de Andrea Maceiras e ilustrado por Sonia García, no noso club de lectura "Medio Pan". Os libros que se van lendo ao longo da vida son viaxes a través de diversas paisaxes literarias. De todas estas viaxes imos configurando o mosaico lector de cada quen, con teselas do que sentimos, do inesperado, de vocabulario novo que nos fai cóxegas...A lectura colectiva dos clubs fai que teñamos recordos cómplices de frases que nos provocou risa, que dramatizamos en voz alta, de dúbidas, incertidumes, sorpresas...Husu Aké, Amazonía, Tacaré...xa forma parte dos nosos pasaportes. Hoxe fixemos unha festa de remate, unha festa para celebrar que pechamos un libro que nos abriu moitas portas.

VISITA A AGADEA. RECORDOS NOS PETOS.

 A semana pasada fixemos unha visita a AGADEA (Ribeira). Preparámola con moito agarimo, facendo distintos faladoiros onde tratamos temas como o alzheimer, a memoria, a necesidade de coidados, a dependencia... Elaboramos con moito mimo un collage colectivo entre todos os grupos referencias da Comunidade de Medianas/os. Reflexionamos plasticamente sobre que cousiñas non nos gustaría esquecer xamais ,relacionado coa nosa escola: os/as amigos/as, os xogos, os contos,...Moldeamos a súa forma a través da metáfora dos petos das prendas. Ás veces, esquecemos algún obxecto neles, e nos levamos unha grata sorpresa ao atopalos. Son recordos que non están perdidos, son recordos que durmen nos petos e de vez en cando acariñan as nosas mans. Nos petos do noso collage metemos saquiños de infusión porque sabemos o importante que é a memoria olfativa, como ésta evoca o pasado para abrazalo no presente, e sentir o seu caloriño aínda que sexa un intre.

 Este foi o agasallo para os avós, as avoas e os/as traballores/as de AGADEA. Foi unha xornada chea de miradas de cariño, de tenrura, de complicidade entre xeracións, de xogos con globos...Moitas grazas a toda a comunidade de AGADEA polo voso recibimento e sensibilidade!

 

 

ESCOLA ABERTA: FAMILIAS EXPERTAS. CONVERSA SOBRE ROBÓTICA E PROTECCIÓN CIVIL.

 "Escola Aberta" é un proxecto de colaboración e implicación de toda a comunidade educativa a través diversas modalidades (familias expertas, colaboradoras, comisións,...) que volve a activarse tras os cursos de pandemia. 

Esta semana visitounos Carlos, o pai de Laia da Comunidade de Pequenos/as. Compartiu con nós moitos coñecementos sobre robótica, cuestións super interesantes do mundo das máquinas. Ademáis tamén nos falou de diversos aspectos sobre Protección civil. Moitas grazas por todo Carlos!

EN CLAVE DE MULLER. UN PERCORRIDO HISTÓRICO- MUSICAL ONDE AS MULLERES SON AS PROTAGONISTAS. CAROLINA RUBIROSA E GEMOLA.

 "En clave de muller" é un proxecto  musical que convertiu a nosa biblioteca nun túnel do tempo cheo de pentagramas de igualdade. A través dun percorrido histórico,  homenaxeamos a todas as  mulleres músicas, moitas veces esquecidas, cantando letras cheas de ledicia, nostalxia, sentimentos, revolucións, etc. Levaron o timón artístico Carolina Rubirosa e Gemola. Moitas grazas amigas por este día tan cheo de enerxía coeducativa!. Moitas grazas ao Concello de Ribeira por esta invitación!

ANDREA MACEIRAS, AUTORA DO LIBRO DO CLUBE DE LECTURA "A FOLLA AZUL".

 Hoxe recibimos na nosa biblioteca a Andrea Maceiras, a autora do libro "A folla azul" que estamos lendo no clube de lectura "Medio pan". Foi unha experiencia xenial poder coñecela en persoa e sentir de preto como é o seu proceso de creación, as súas fontes de inspiración...como a literatura forma parte da súa vida e como  moldea as palabras para escribir relatos tan fermosos como os que podemos atopar nesta obra. Moitas grazas Andrea polo teu tempo, pola túa enerxía e pola viaxe literaria da que tanto gozamos hoxe!

21 DE MARZO. DÍA DA POESÍA. DÍA DAS ÁRBORES.MANIFESTO ECOPOÉTICO.

 Para celebrar o Día da Poesía e o día das Àrbores colocamos no patio as casiñas de paxaros que estivemos preparando. Lemos un anaquiño do manifesto ecopoético de Claudio Rodriguez Fer.

 

LIBROS PASEANTES.

Os libros habitan por toda a escola, non permanecen só en estanterías verticalmente. Mostran as súas mellores galas para ser expostos, descansan en cestiñas, agochanse en caixas, saúdan dende balcóns... Son libros paseantes.

REFERENTES DE MULLERES PARA OS PUNTOS HEROÍNAS.PROXECTO "TIÉBÉLÉ: MULLERES ESDRÚXULAS". ARTISTAS

 A biblioteca é un manantial de información para ir coñecendo mulleres negras nos distintos ámbitos do coñecemento, por exemplo no mundo arte e da fotografía. Esta información visual será traballada nos faladoiros, nos ambientes de identidade artística e na Editorial, así como en distintos Puntos Heroínas.

PRESENTACIÓN DE MULLERES ARTISTAS: Esther Mahlangu, Nina Chanel Abney, Lubaina Himid, Lois Mailov Jones...

PRESENTACIÓN DE FOTÓGRAFAS: Carrie Mae Weems; Lorna Simpson, Deana Lawson, Angélica Dass...

A BIBLIOTECA COMO ESPAZO DE ENCONTROS CULTURAIS: ENTROIDO GALEGO.

 

Uxío, da Comunidade de Medianos/as mostrounos un disfraz típico de Ourense:

Peliqueiro de Laza; explicándonos a súa orixe, partes que o compoñen,...compartindo

os seus coñecementos e enriquecendo a todo o alumnado e profesorado desta tradición

do Entroido galego.

PUNTO HEROÍNAS DO AMBIENTE DE AQUELAR E DO AMBIENTE DE ATELIER (COMUNIDE DE PEQUENAS E PEQUENOS)

 Como comentamos cando falamos dos Puntos Heroínas dos ambientes das nosa escola, iremos pouco a pouco presentándoos.

 PUNTO HEROÍNAS DO AMBIENTE AQUELAR (Identidade da vida cotiá): Nel podemos atopar mulleres da nosa comunidade educativa (avoas, tias, nais, veciñas...) onde comparten distintas historias da vida cotiá: montando en bicicleta, levando lotes na cabeza...poñendo deste xeito en valor ás mulleres das nosas familias. As tres bolboretas que podemos observar son as irmáns Mirabal (asasinadas o 25 de Novembro pola súa loita a favor da liberdade, sinalando no almanaque a data do seu falecemento como día contra a violencia machista).

 

PUNTO HEROÍNAS DO ATELIER (Identidade artística): Presidido polas "mulleres do pincel".  Mulleres que pasaban todo o día varrendo e un día decidiron cambiar a vasoira polos pinceis.Neste Punto Heroínas periodicamente vanse expoñendo monográficos de distintas artistas mulleres, con libros, imaxes...